Iñigo Urkulluk nabarmendu du lankidetza publiko-pribatua izango dela Enkarterriko ekonomia eta gizartea suspertzeko abian jarri diren proiektuetan, hain zuzen ere, Lehentasunezko Jarduketa Eremuak - Eskualde Behartsuak Bultzatzeko Planean sartutakoetan. Bingen Zupiria eta Javier Hurtado sailburuekin batera, Lehendakariak zuzenean ezagutu du Plan honetan sartutako sei proiektuen gauzatze-maila. Proiektu horiek 50 jarduera eta erakundeen artean 65 milioi eurotik gora inbertitzea eragingo dute. Ekitaldia Gueñeseko Basque Design Centerren egin da, eta bertan izan dira, besteak beste, Bizkaiko eskualde hori osatzen duten 11 udalerrietako alkateak.

“Eusko Jaurlaritza, Foru Aldundia, udalak, Mankomunitatea, eragile sozioekonomikoak, prestakuntza-zentroak eta enpresak, denak helburu komun baten alde lanean: Enkarterri etorkizunerantz berrabiaraztea“ – esan du Lehendakariak.

Hitzaldia gogorarazi duenez, abian diren proiektuen helburuak honako hauek dira: barneko eta kanpoko mugikortasuna hobetzea; turismo- eta kultura-aktiboen arteko konexioa; hezkuntza- eta lan-mundua integratzea; landa-eremuak digitalizatzeko banda zabala hedatzea; enpresa-espazioak sortzea; eta bioekonomia sustatzea.

Eskualdearen potentzialtasunaren eta eraldatzeko aukeren adibide gisa, Iñigo Urkulluk Gueñesko etorkizuneko Bioekonomia HUBa aipatu du, izan ere nekazaritzako, industriako, basogintzako eta ekonomia zirkularreko jarduera berritzaileak sustatuko ditu hub horrek.

“Ekimen bateratu horien bidez bakarrik, non guztiok ahotsa eta erabakitzeko gaitasuna dugun, identifikatu eta asmatu ahal izango dugu benetan aurrez aurre ditugun lehentasunen erantzunean” – esan du amaitzeko.