2026ko otsailaren 17tik 19ra, Lublin hiriak (Polonia) CONNECT Aviation – Route Development Forumaren 22. edizioa hartu du, abiazio-sektorean mundu mailako erreferentziazko foroetako bat. Urteroko topaketa honek airelineetako, aireportuetako, turismo-helmugetako eta aire-sareen garapenari lotutako erakundeetako buruak biltzen ditu, ibilbideen, negozioen eta ekonomiaren hazkundea sustatzeko helburuarekin. Edizio honetan, 60 herrialde baino gehiagotako 800 profesional inguruk parte hartu dute.

Euskadi Basque Country CONNECT 2026 azokan izan da Bilboko eta Gasteizko aireportuen ordezkaritzarekin, eragile hauen bidez: Bilbao Air (Bilboko Aireportua Sustatzeko Elkartea), Bilbo Turismo eta VIA (Gasteizko Aireportua Sustatzeko Elkartea). Partaidetza horrek gure helmugak aire-konexioa sustatzeko eta nazioarteko airelinea, operadore eta helmugekin harremanak sendotzeko duen konpromisoa berretsi du.

Euskal ordezkaritzak stand propioa izan du CONNECT azokan; horri esker, gune pribilegiatua izan du bilerak egiteko, nazioarteko aeronautika-sektoreko eragile nagusiekin harreman berriak sortzeko eta lehendik zeudenak indartzeko.

Edizio honetako berrikuntza nabarmen gisa, Euskadi Basque Countryk ekitaldiko akreditazioak eta lanyardak babestu ditu. Ekintza estrategiko horren helburua Euskadi markaren ikusgarritasuna sustatzea izan da bertaratu diren 800 profesionalen artean, eta nazioartean turismo zein negozio helmuga gisa duen kokapena indartzea.

The Airport Agencyk antolatuta, CONNECT Aviation goi mailako topaketa bat da. Networking programa indartsua, B2B bilerak eta hitzaldi-sorta bat konbinatzen ditu, sektoreko azken berrikuntzak eta etorkizuneko perspektibak mundu aeronautikoko zuzendari eta aditu nagusien eskutik ezagutzeko. Haren formatuak negozio-aukera berriak, aliantzak eta nazioarteko konexioak sortzea errazten du, giro profesional eta lasai batean.