BASQUETOUR

Donostiak bat egiten du HTA (DTI) ereduaren ezarpenaren arloan bikaintasuna gidatzen duten nazioarteko helmugen taldearekin, garapen turistikoaren abangoardian kokatuz eta gobernantzan, iraunkortasunean, irisgarritasunean, berrikuntzan eta teknologian oinarritutako etorkizuneko estrategiarekin, ardatz egituratzaile gisa.

Estau mailan, Donostiaz gain, Benidormek, Gijónek, Málagak, Tenerife Uharteak eta Santanderrek lortu dute helburu hori. Eta nazioartean Medellin hiriak (Kolonbia).

Euskal hiriburuko prozesu metodologikoa 2018an hasi zen, DTI diagnostikoaren eskaerarekin eta ekintza-plana gauzatzeko konpromisoarekin. Diagnostiko-fasea 97 betekizunen eta 261 adierazleren bidez hasi zen. Adierazle horietan, helmugaren heldutasun-maila baloratzen da metodologiari dagokionez, eta, gainera, helbururako ekintza-plan bat eratortzen duten gomendioen "feedback" bat lortzen da. Fase hori egin ondoren, estrategia- eta plangintza-fasea hasten da, eta, bertan, ekintza-plan horretan integratutako ekintzak gauzatzeko prozesua ezartzen da, haien lehentasunetik edo egutegietatik hasi eta inbertsioak identifikatu arte, beharrezkoa den kasuetan.

Aintzatespen horrek bi urteko balioa du, eta berrikuntza-prozesu baten mende dago; beraz, etengabe hobetzeko prozesu baten mende jartzen du helmuga, eta helburuak eta estrategiak berritzeko eta etorkizuneko ingurunearen beharretara egokitzeko konpromisoa hartzen du, HTA ereduaren oinarri diren gobernantzaren, jasangarritasunaren, teknologiaren, berrikuntzaren eta irisgarritasunaren bidez helmugaren balioa handitzea ekar dezaten.

Donostiak, etengabeko hobekuntza-prozesu honetan, hiriko ekintza-planaren baldintzak % 80tik gora betetzea lortu du.

Donostiako Udala Helmuga Turistiko Adimendunen Sareko kide da eratu zen unetik bertatik, eta Udalak helmuga eraldatzeko egin duen apustuaren erakusgarri da. Azkenean, Helmuga Turistiko Adimendunaren metodologia ezarri du.

Turismo Helmuga Adimendunaren Programa

Turismoko Helmuga Adimenduna programa Turismoko Estatu Idazkaritzak (SETUR) sustatutako eta Berrikuntza eta Teknologia Turistikoak Kudeatzeko Estatuko Merkataritza Sozietateak (SEGITTUR) kudeatutako proiektua da, helmuga turistikoen lehiakortasuna eta bertako egoiliarren bizi-kalitatea hobetzen laguntzea helburu duena, bost jarduera-eremutan eraginez: gobernantza, berrikuntza, teknologia, iraunkortasuna eta irisgarritasuna.

Helmuga turistiko adimenduna helmuga turistiko berritzaile gisa definitzen da, abangoardiako azpiegitura teknologiko baten gainean finkatua, lurralde turistikoaren garapen iraunkorra bermatzen duena, guztiontzat irisgarria, bisitariaren eta ingurunearen arteko elkarreragina eta integrazioa errazten duena, eta helmugan duen esperientziaren kalitatea eta egoiliarraren bizi-kalitatearen hobekuntza areagotzen dituena.

Helburu horiek lortzeko, HTA programak kudeaketa-eredu bat ezartzea sustatzen du, turismo-jardueraren zeharkakotasuna eta helmuga bakoitzaren ezaugarri bereizleak kontuan hartzen dituena. 97 eskakizunetan eta 261 adierazletan oinarritutako diagnostiko-metodologia baten gainean egituratzen da. Metodologia horren ondorioz, gomendio-sistema bat, ekintza-plan bat eta monitorizazio-sistema bat sortzen dira, ereduaren funtsezko elementuak osatzen dituztenak, eta helmugaren kudeaketa etengabe hobetzeko prozesua ahalbidetzen dute, turismoaren oraingo eta etorkizuneko erronketara egokituta.

Donostian,HTA metodologia ezartzeko prozesuan, Eusko Jaurlaritzaren Turismo, Merkataritza eta Kontsumo Sailaren laguntza instituzionala eta ekonomikoa izan da, Basquetour Turismoaren Euskal Agentziaren bitartez, eta udal-arlo guztien eta helmugako eragile pribatuen inplikazioa izan da, HTA baten funtsezko ardatz multzorako xedearen ebaluazioa egiteko behar den informazioa ematen lagundu baitute, hura osatzen duten 97 eskakizunetan eta 261 adierazletan oinarrituta.